Pilar Fernández Pardo.
IVÁN G. FERNÁNDEZ (LES NOTICIES). Pilar Fernández Pardo vuelve a encarar les elecciones a l’alcaldía de Xixón. Nesta ocasión, la reindustralización de la villa de Xovellanos ye ún de los apuestes fuertes del so programa electoral xunto al fomentu del empléu. Amás, si lleguen a gobernar, afirma que van facer un proyectu «más ambiciosu» pa cola llingua asturiana.
Cola vista puesta nesa cita tan importante del 22 de mayu, de tolos demás candidatos, ¿quién incomoda más al PP?
Respeto muncho a toles opciones polítiques y a tolos candidatos que se presenten, pero nun me distraigo nin un minutu n’abordar eses candidatures, sinón tolo contrario, en facer una precampaña a pie de cai, porque tamos llegando a tolos requexos de Xixón. Esto ye dalgo mui importante y asina lo tratamos: amás de llegar a los ciudadanos con un folletu hai que lo facer con esi intercambiu dialécticu que te permite saber qué ye lo que la xente opina y, al empar, l’electoráu pue conocer lo que tu-y ofreces. Eso xenera muncha sorpresa nos ciudadanos. ¿Por qué digo esto? Por una razón mui cenciella: nestos años la prepotencia instalóse nel Conceyu de Xixón y los socialistes nun dialoguen cola xente, nun salen a la cai y nun faen casu de lo que diz la xente. Eso pal PP ye fundamental.
Esa mesma prepotencia de la que fala en Xixón, ¿ye la mesma de la que se quexen n’Uviéu col PP?
Yo namás falo del ámbitu municipal de Xixón y, como soi la candidata a l’alcaldía, quiero un Gobiernu del PP en Xixón. Parezme que de lo que pase n’otres ciudades son otros los que tienen que falar y seguro que lo van facer, pero caún na so ciudá y yo na mía.
Nuna entrevista que concedía a una canal de televisión usté pidía la oficialidá de la llingua asturiana. ¿Sigue pensando lo mesmo?
Lo que sí-y pue dicir ye que’l Gobienru del PP de Xixón va ser ambiciosu cola llingua asturiana porque tamos arguyosos de la nuestra cultura y eso ye importante. Nosotros apoyamos el Plan pa la Normalización Social de la Llingua Asturiana, la Ordenanza de la Llingua nel Conceyu. Y, amás, tengo que recordar que nel añu 2009 presentemos un plan que yera más ambiciosu de lo qu’hai agora. Daquella presentemos un documentu con 108 inicitatives y actividaes, que depués quedaren reducíes a 52 cola aprobación del equipu de Gobiernu. Por eso digo que queremos ser más ambiciosos nesti ámbitu. Tamos a favor de la normalización social, pero nunca de la imposición, siempre con respetu a quien quiera facer usu dende l’Alministración.
Pue lleer la entrevista completa na edición impresa de LES NOTICIES
